अनलाइन डबलीकाठमाडौं । स्वास्थ्य सेवाका कर्मचारीहरु काज फिर्ता हुन अटेरी गरिरहेका छन् । स्वास्थ्य तथा जनसंख्या मन्त्रालयले करोना महामारीको बेला कामजागमा पठाएका सम्पूर्ण कर्मचारीलाई फिर्ता हुन पत्रचार गर्दा समेत उनिहरु फिर्ता हुन मानिरहेका छैनन् ।
मन्त्रालयले संघ, प्रदेश र स्थानीय तहमा काजमा रहेका करिब ८ सय कर्मचारीलाई दरबन्दी भएकै स्थानमा फिर्ता हुन र गराउन तीनै तहका निकायलाई पत्र पठाएको थियो । तर, हालसम्म दरबन्दीमा फिर्ता हुन मानिरहेका छैनन् ।
यसैबीच स्वास्थ्य सेवा विभागले १ साउनदेखि काजका कर्मचारीलाई हाजिर गराएर तबल भुक्तानी दिएमा सम्बन्धित कार्यलय प्रमुख र आर्थिक प्रशासन प्रमुखबाट असुल उपर गर्ने चेतावनी दिएको छ । यही साउन १४ गते विभागको निर्देशनअनुसार फिर्ता नपठाएर हाजिर गर्न दिने र तलब भुक्तानी गर्ने कार्यलय प्रमुख र आर्थिक प्रशासन प्रमुखबाट उक्त रकम असुलउपर गर्न लेखापरीक्षण गर्ने निकायलाई चेतावनी दिइएको छ ।
विभागले निर्णय कार्यान्वयन नगर्ने र नगराउने कर्मचारीलाई विभागीय कारवाही गर्ने समेत बताएको छ ।
स्वास्थ्य मन्त्रालयले असार १७ र २५ गते मन्त्रिस्तर निर्णय गरेर दोहोरो सहमति लिएर कामकाज गरिरहेका मातहतका कर्मचारीलाई आफ्नो दरबन्दीमा फर्किन निर्देशन दिएको थियो ।
त्यस्तै निर्णय बैशाख २७ गते संघीय मामिला तथा सामान्य प्रशासन मन्त्रालयको परिपत्र जारी गरेर काज फिर्ता हुन भनेको थियो ।
यही आधारमा विभागले काजमा बसेका कर्मचारीहरुलाई विदा, काज, पेश्की, इन्धन उपलब्ध नगराउने, हाजिरीसमेत बन्द गर्ने निर्णय समेत गरेको छ ।
