काठमाडौं । आजबाट देशभर फेरि मनसुन सक्रिय भएको छ । मनसुन सक्रिय भएसँगे बर्षा भइरहेको छ । मौसम पूर्वानुमान महाशाखाका अनुसार देशका धेरै स्थानमा भारी वर्षा हुनेछ ।
आज प्रदेश १, प्रदेश २, वाग्मती, लुम्बिनी प्रदेश र गण्डकी प्रदेशका केही ठाउँमा ठूलो पानी पर्न सक्ने मौसमविदले अनुमान गरेका छन् ।
आजदेखि शनिबारसम्म देशका केही स्थानमा भारी बर्षा हुने र धेरै स्थानमा बाढी र पहिरो आउन सक्ने भन्दै सतर्क रहन महाशाखाले आग्रह गरेको छ ।
त्यस्तै, सप्तकोशीका सहायक नदीहरु तमोर, सुनकोसी, नारायणीका सहायक नदीहरु त्रिशुली, बुढीगण्डकी, मर्स्याङ्दी लगायत वाग्मती, कन्काई, कमलामाई तथा प्रदेश १, प्रदेश २, वाग्मती र गण्डकी प्रदेशका मध्यपहाडी, चुरे तथा तराईका ससाना खोलाहरुमा आकस्मिक बहाव आउन सक्ने भएकाले सावधानी अपनाउन बाढी पूर्वानुमान महाशाखाले आग्रह गरेको छ ।
