काठमाडौं । भारतमा नयाँ प्रकृतिको कोरोना भाइरसको संक्रमण तीब्ररुपमा फैलिएको छ । भारतीय संचारमाध्यमहरुका अनुसार कोरोना संक्रमण नियन्त्रण बाहिर गएको छ ।
भारतमा कोरोना भाइरस संक्रमण बढेसँगै नेपालमा प्रवेश गर्नेको संख्या निकै बढेको छ । खुला सीमा नाकामा दैनिक हजारौं नेपाली विना स्वास्थ्य मापदण्ड भित्रिरहेका छन् । यसले नेपालमा कोरोनाको जोखिम बढाएको छ ।
भारतमा कोरोना भाइरस बढेसँगै नेपालमा त्यसको प्रभाव पर्ने देखिएको भन्दै स्वास्थ्य तथा जनसंख्या मन्त्रालयले लकडाउन गर्नु पर्ने हुन सक्ने बताएको छ । स्वास्थ्य मापदण्डको पालना गर्न समेत मन्त्रालयले आग्रह गरेको छ ।
यसैबीच काठमाडौं उपत्यकाका तीनै जिल्ला प्रशासन कार्यालयले स्वास्थ्य मापदण्ड पालना नगरे कारवाही गर्ने चेतावनी दिँदै मास्क लगाउने र अनायवश्यक भिडभाड नगर्न भनेको छ ।
काेराेना सङ्क्रमण फैलिन नदिन तीनवटै जिल्ला प्रशासन कार्यालयले सार्वजनिक ठाउँमा भिडभाड नगर्न, होली पर्वलाई घरमै मनाउन आग्रह गरेका छन् ।
सार्वजनिक ठाउँ तथा गाडीमा हिँड्दा अनिवार्य मास्क, स्यानिटाइजर र सामाजिक तथा भौतिक दुरी कायम नगरे कारबाही गर्ने जिल्ला प्रशासन कार्यालय काठमाडौंले जनाएकाे छ ।
कोरोना भाइरस संक्रमण बढेसँगै भारतले खोप निर्यातलाई रोकेको छ ।
नेपालमा पछिल्ला दिनमा संक्रमण दर बढेको छ । बुधबार थप १ सय ४५ जनामा कोरोना भाइरसको सङ्क्रमण पुष्टि भएको छ । स्वास्थ्य तथा जनसंख्या मन्त्रालयका अनुसार ३९ सय ६३ जनाको पीसीआर परीक्षण गर्दा एक सय ४५ जनामा कोरोना सङ्क्रमण पुष्टि भएको हो ।
योसँगै नेपालमा कोरोना भाइरसको सङ्क्रमण पुष्टि हुनेको सङ्ख्या दुई लाख ७६ हजार तीन सय ८९ पुगेको छ । यस्तै बुधबार ९० जना निको भएसँगै कोरोना सङ्क्रमणमुक्त हुनेको सङ्ख्या दुई लाख ७२ हजार एक सय ८७ पुगेको थियो ।
यस्तै काेराेना सङ्क्रमणबाट एक जनाको ज्यान गएसँगै कोरोना सङ्क्रमणबाट ज्यान गुमाउनेको सङ्ख्या तीन हजार २० पुगेको स्वास्थ्य मन्त्रालयले जनाएको छ । अहिले नेपालमा ११ सय ८२ जना सक्रिय सङ्क्रमित रहेका छन् ।