काठमाडौं । सत्तारुढ नेपाल कम्युनिष्ट पार्टी (नेकपा) को सचिवालय बैठक सरेको छ । आज दिउँसो १ बजे बस्ने भनिएको बैठक प्रधानमन्त्री तथा अध्यक्ष केपी शर्मा ओलीको व्यस्ताका कारण २ बजे बस्ने भएको हो ।
प्रधानमन्त्रीका प्रेस सल्लाहकार सूर्य थापाले बैठक २ बजे प्रधानमन्त्री निवास बालुवाटारमा बस्ने बताएका छन् ।
आजको बैठकमा ओली अन्ततः सहभागी हुन सहमत भएका छन् । हिजोकै बैठकबाट यस्ता बैठकमा सहभागी नहुने भन्दै ओली बाहिरिएका थिए । बुधबार विहानसम्म पनि ओलीले बैठकमा नआउने बताइरहेका थिए । तर ओली निकट दोस्रो पुस्ताका नेताहरुले बैठकमै गएर मुकाविला गर्न सुझाव दिएका थिए ।
प्रचण्डले बैठकमा पेश गरेको प्रस्ताव फिर्ता नभएसम्म बैठकको औचित्य नभएको ओलीले बताउँदै आएका थिए । मंगलबारको बैठकमा पेश गरिएका प्रस्तावमा छलफल गर्न ओली तयार नभएपछि बैठक स्थगित भएको थियो ।
