काठमाडांै । होम क्वारेन्टाइनमा बसेको ४५ वर्षीय एक जनाको राजबिराजमा ज्यान गएको छ । उनकाे परिवारले बुधबार बिहान शव अन्तिम संस्कार गर्न लाग्दा जिल्ला स्वास्थ्य कार्यालयले कोरोना संक्रमणको आशंकामा अन्तिम संस्कार गर्न रोक लगाएको छ ।
कोरोनासँग मिल्दोजुल्दो लक्षण देखिएकाले स्वाब संकलनपछि मात्र शव अन्तिम संस्कार गर्न दिइने जिल्ला स्वास्थ्य कार्यलय प्रमुख दुनियालाल यादवले जानकारी दिए ।
उनि डेढ महिनाअघि मलेसियाबाट आई होम क्वारेन्टाइनमा बसेका रुपनी गाउँपालिका–५ गढियाका हुन । केही दिनदेखि उनमा ज्वरो देखिएका उनलाई मंगलबार अझ च्यापेको र
दम बढेपछि उपचारका लागि गजेन्द्रनारायण सिंह अस्पताल राजविराज ल्याइएकोमा त्यहाँ उपचार हुन नसकी बीपी कोइराला स्वास्थ्य विज्ञान प्रतिष्ठान धरानमा रिफर गरिएको थियो । तर, अस्पताल परिसरमा पुग्नेबित्तिकै उनको मृत्यु भएको जिल्ला स्वास्थ्य कार्यलय प्रमुख यादवले बताए ।
उनका अनुसार उनले पीसीआर परीक्षण गराएका थिएनन् । पीसीआर परीक्षणका लागि बोलाउँदा परिवारले उनी राजविराज गएको र उतै गराउने भन्दै पन्छिने गरेको गाउँपालिकाका अध्यक्ष हरेराम यादवले बताए ।
अहिले ‘स्वाब संकलनका लागि स्वास्थ्यकर्मी खटाइसकिएको पनि यादबले जानकारी दिए ।
