अनलाइन डबली
रौतहट । मेडिकल व्यवसायी तथा ‘राष्ट्र, राष्ट्रियता, धर्म–संस्कृति र नागरिक बचाउ महाअभियान’ का संयोजक दुर्गा प्रसाईँ मंगलबार पर्सा जिल्ला अदालतको आदेशपछि हिरासतमुक्त भएका छन् । अदालतमा भएको थुनछेक बहसपछि न्यायाधीश गायत्रीप्रसाद रेग्मीको एकल इजलासले प्रसाईँलाई साधारण तारेखमा छाडेर मुद्दाको पूर्पक्ष गर्न दिने आदेश जारी गरेको हो । अदालतको यो निर्णयसँगै उनले अब जेलबाहिरै रहेर कानुनी लडाइँ लड्न पाउने भएका छन् ।
पर्सा जिल्ला अदालतका न्यायाधीश रेग्मीको इजलासले प्रसाईँलाई थुनामा राखिरहनु नपर्ने ठहर गरेको हो । अदालत स्रोतका अनुसार, मुद्दाको अन्तिम किनारा नलागेसम्म उनलाई तारेखमा राख्दै कानुनी प्रक्रिया अगाडि बढाउन आदेश दिइएको छ ।
जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक (डिएसपी) हरिबहादुर बस्नेतले अदालतको औपचारिक आदेश प्राप्त भएपछि प्रसाईँलाई साधारण तारेखमा रिहा गरिएको पुष्टि गरे । मंगलबार अदालतमा सरकारी वकिल र प्रसाईँका कानुन व्यवसायीहरूबीच निकै बेर थुनछेक बहस भएको थियो । दुवै पक्षको बहस सुनेपछि अदालतले प्रसाईँलाई न्यायिक हिरासतमा राखिरहन आवश्यक नरहेको निष्कर्ष निकालेको हो ।
प्रहरीले दुर्गा प्रसाईँलाई गत मंगलबार वीरगन्जबाट पक्राउ गरेको थियो । उनीविरुद्ध दुईवटा गम्भीर मुद्दा दर्ता गरिएका थिए ।
सामाजिक सञ्जाल तथा सञ्चारमाध्यममार्फत भ्रम फैलाएको र साइबर अपराध गरेको आरोपमा विद्युतीय (इलेक्ट्रोनिक) कारोबार ऐन अन्तर्गतको कसूर र राज्यको शान्ति सुरक्षा र प्रणालीलाई खलल पुर्याउने खालका गतिविधि तथा अभिव्यक्ति दिएको आरोपमा राज्यविरुद्धको कसूर का मुद्दा दर्ता गरिएका थिए ।
यिनै मुद्दाहरूमा अनुसन्धान गर्न प्रहरीले उनलाई हिरासतमा राखेर कानुनी कारबाही अगाडि बढाएको थियो । पछिल्लो समय मेडिकल व्यवसाय भन्दा बढी आफ्नो राजनीतिक तथा सामाजिक अभियानका कारण प्रसाईँ चर्चामा छन् ।
