अनलाइन डबली
काठमाडौँ । पाथिभरामा केबलकार निर्माणको विरोधमा पूर्वका ९ जिल्ला दुई दिन बन्द आह्वान गरिएको छ । पहिचान पक्षधरले आह्वान गरेको बन्दको पहिलो दिन पूर्वपश्चिम राजमार्ग र मेची राजमार्ग बन्द छन् । लामो दूरीका सवारी साधान चलेका छैनन् ।
मुकुम्लुङ संरक्षण अन्तरदलीय संघर्ष समितिले प्राकृतिक सम्पदामाथि माफियाको राज रोक्न भन्दै आज र भोलि अरुणपूर्वका ९ जिल्लामा आह्वान गरेको हो ।
बन्दकर्ताहरुले केबलकार निर्माणको निर्णय खारेज हुनुपर्ने, आन्दोलनका क्रममा पक्राउ परेका नेता कार्यकर्ता छाड्नुपर्ने, मुकुम्लुङमा गोली चलेको घटनाको न्यायीक छानविन गर्नुपर्ने, काफ्ले पार्टीबाट सुरक्षा फौज फिर्ता गर्नुपर्नेलगायत माग राखेका छन् । बन्दका कारण झापा, मोरङ, सुनसरी, तेह्रथुम, संखुवासभा, ताप्लेजुङ, इलाम र पाँचथरको जनजीवन प्रभावित भएको छ ।
केबलकार निर्माणको विरोधमा उत्रिएका स्थानीयमाथि बलुडाँडामा प्रहरीले दमन गर्दा २६ जना घाइते भएका थिए । जसमा २१ जना प्रहरी रहेका छन् । स्थानीयमाथि प्रहरीले गोली चलाउँदा दुई जना घाइते भएका छन् ।
