अनलाइन डबली
काठमाडौं । माओवादी केन्द्रका नेता जनार्दन शर्माले, देश रुपान्तरण भन्दा पहिले माओवादी पार्टी आफै रुपान्तरण हुन जरुरी रहेको बताएका छन् ।
माओवादी रुपान्तरण अभियान अन्तरगत चन्द्रागिरि २ मा आयोजित कार्यक्रममा उनले पार्टीलाई जनताको माग र आवश्यकता अनुसार रुपान्तरण गर्न र समृद्ध राष्ट्र निमार्ण गर्न अभियान महत्वपूर्ण हुने विश्वास व्यक्त गरे ।
उनले भने, ‘माओवादीले लिएको लक्ष्य प्राप्त गर्न सक्दैनौ भने यो प्राप्त भएको उपलब्धी जनताले पाएको अधिकार समाप्त हुनेछ । त्यसकारण यो अधिकारको रक्षा गर्दै त्यसको कार्यान्वयन गर्न सक्ने स्तरमा समाज, देश बनाउँन सामाजिक रुपान्तरण र देशका लागि माओवादी पार्टीको आफ्नै रुपान्तरण आवश्यक छ । ’
युवा शक्तिलाई एकीकृत गरेर समृद्ध राष्ट्र बनाउँन रुपान्तरणको अभियानका लागि पार्टीले आवश्यक पहल गर्नु पर्ने उनको भनाई छ ।
उनले भने, ‘पार्टीलाई जनताको माग र आवश्यकता अनुसार जनताले चाहे जस्तो बनाउँन र रुपान्तरण, राज्यलाई सामाजिक न्यायको अभिभावक बनाउँन, शासन प्रक्रियालाई जनमुखी बनाई सुशासन स्थापित गर्न यो अभियानको आवश्यकता परेको हो । देशलाई साधन, स्रोत र युवाहरुको शक्तिलाई एकीकृत गरेर समृद्ध राष्ट्र बनाउँन यो अभियान आवश्यक परेको हो । ’
यसको साथै उनले पार्टीलाई आवश्यक परेको नयाँ विचार निमार्ण गर्न र पार्टीभित्रको कमि कमजोरीलाई सुधार गर्ने प्रविद्धताको लागि नै रुपान्तरण कार्यक्रमको आयोजना भएको पनि बताए ।
