अनलाइन डबली
काठमाडौं । राष्ट्रवादीहरुको साझा संगठनले देशको राष्ट्रिय स्वाधिनताको रक्षाको लागि राजसंस्थाको पुनस्थापनाको माग गरेको छ । शुक्रबार राजधानीको संवाद डबलीमा पत्रकार सम्मेलनको आयोजना गरी तत्कालिन राजा ज्ञानेन्द्रसंग गरीएको ५ बुँदे सहमति तत्काल कार्यान्वयन हुनुपर्नेसमेत माग गरेका छन् ।
वरिष्ठ पत्रकार प्रेम कैदीले अहिलेको व्यवस्था पूर्णरुपले जनविरोधी भएकोले यसको विकल्पमा पुन राजसंस्थाको विकल्प नरहेको बताए । “गणतान्त्रीक व्यवस्थाका हरेक शासकहरु विदेशीको इसारामा चल्ने गरेकोले राष्ट्रियता जोगाउन राजसंस्थाको अपरिहार्यता भयो” कैदीले भने ।
रामराजय परिषदका धर्माध्यक्ष जगत बहादुर थापाले २०१९ सालदेखि भारतले कालापानी क्षेत्रलाई कब्जा गरेकोले तत्काल भारतिय सेनाले सो क्षेत्र छाड्नुपर्ने माग गरे । “२०४७ सालदेखि आजसम्मका कुनै पनि नेता तथा शासकहरुले नेपाली भूमीबाट भारतिय सेना फिर्ता गर अनि मात्रै वार्ता गर्छौं भन्नै सकेनन, अब आम नेपालीले त्यसविरुद्ध संघर्ष गर्नै पर्ने भयो । नेपालको राष्ट्रिय स्वाधिनतका लागि पनि राजसंस्था आवश्यक रहेको थापाको जिकिर छ ।
राष्ट्रवादीहरुको साझा संगठनको प्रमुख अभियान्ता माया पाण्डेले २०६३ वैशाख ११ गते तत्कालिन दलहरुले राजासँग गरेको ५ बुँदे सहमति कार्यान्वयन नगरेकोले ४ वर्षदेखि माइतिघर मण्डलामा धर्ना बसेको जनाईन् ।
अभियानकी माता अम्बिका नेपालले देशको स्वाधीनता जोगाउन राजाको आवश्यकता रहेको जिकिर गरिन् ।
अभियान्ता विष्णुसिं डंगोलले नेपालको धर्म र संस्कृतिको रक्षा नभए विश्वमा नै उथलपुथल आउने दाबी गरे ।
अभियनको व्यवस्थापक शंकर मघैयाले देशमा प्रजातान्त्रीक संवैधानिक अधिकारको रक्षाको लागि सबैले राजसंस्थाको स्थापन हुनुपर्ने धारणा राखे ।
सो कार्यक्रमको सभाअध्यक्ष बलरमा गौतमले गरेका थिए ।
