अनलाइन डबली
काठमाडौँ । बुधबार सिंहदरबारमा सरकार र जेनजीबीच भएको १० सहमति विवादमा परेको छ । जेनजीको ठूलो समूहले सहमति नमान्ने घोषणा गरेपछि उक्त सहमति कार्यान्वयन हुनेमा शंका पैदा भएको छ ।
प्रधानमन्त्री कार्यालयमा भएको सम्झौतामा हस्ताक्षर कार्यक्रममै जेनजी अगुवाहरुले विरोध जनाएका थिए । उनिहरुले सम्झौता च्यातेर विरोध जनाएपछि प्रधानमन्त्री सुशीला कार्की उठेर हिडेकी थिइन् ।
कार्कीले सीमित व्यक्तिहरुको स्वार्थअनुसार सहमतिपत्रमा हस्ताक्षर भएको जेनजी अगुवाहरुले आरोप लगाएका छन् । सरकारले तीन महिनापछि गरेको सम्झौतालाई पनि सबैले स्वमित्व लिने वातावरण बनाउन नसकेको उनिहरु बताउँछन् ।
यसैबीच सरकारसँग भएको सहमतिप्रति असहमति जनाउँदै मिराज ढुंगाना समूहले विज्ञप्ति जारी गरेको छ । ढुंगानाले आन्दोलनका मूल आवाज र मागहरूको उचित प्रतिनिधित्व गर्न नसकेको आरोप लगाए ।
विज्ञप्तिमा भनिएको छ, ‘सम्झौता पत्रमा आन्दोलनका केही मागहरू सम्बोधन भए पनि प्रमुख मागहरू स्पष्ट, ठोस र कार्यान्वयनयोग्य रूपमा समेटिएका छैनन् र चुनावअघि तिनको कार्यान्वयनबारे कुनै सुनिश्चितता दिएको छैन।’
ढुङ्गानाले सरकारको हालको सम्झौता प्रक्रियाले देशको स्थायित्व, सुशासन र परिवर्तनको मूलभूत आवाजलाई बेवास्ता गरेको आरोप लगाउँदै जनताको भावना, बलिदान र परिवर्तन चाहने मनोभावनालाई उपेक्षा गर्दै गरिने कुनै पनि सहमति स्वीकार्य नहुने चेतावनी दिए ।
उनको समूहले आजबाट सिंहदरबार केन्द्रीत संघर्षाका कार्यक्रम गर्ने भएको छ ।
