अनलाइन डबली
काठमाडौँ । माइतीघर मण्डलाबाट ‘जेनजी युनाइटेड परिवर्तन’ समूहका सदस्यहरूलाई प्रहरीले नियन्त्रणमा लिएको छ । गत भाद्र २३ र २४ गतेको ‘जेन्जी आन्दोलन’ मा मृत्यु भएका सहिदहरूको सम्झनामा फोटोसहितको ब्यानर प्रदर्शन गर्ने तयारी गरेका थिए ।
तर, प्रहरी प्रशासनले अनुमति बिना सार्वजनिक प्रदर्शन गर्न नपाइने भन्दै उनीहरूलाई रोक्दै नियन्त्रणमा लिएको हो । शुक्रबार पनि सोही समूहले प्रदर्शन गरेको थियो । भाईटिकाको दिन सहिदको फोटोमा माला लगाएर तिहार मनाएको सो समुहले सबै जेनजीबीच एकता हुनुपर्ने बताउँदै आएको छ ।
यसैबीच आजै प्रधानमन्त्री सुशीला कार्कीले चारवटै सुरक्षा निकायका प्रमुखसँग छलफल गरेकी छन् ।
प्रधानमन्त्री निवास बालुवाटारमा भएको छलफलमा प्रधानमन्त्री सुशीला कार्कीसँग गृहमन्त्री ओमप्रकाश अर्याल, गृहसचिव रामेश्वर दंगाल पनि सहभागी थिए ।
करिब दुई घण्टा चलेको बैठकमा सुरक्षा प्रमुखहरूले वर्तमान अवस्थाबारे आ–आफ्नो विश्लेषण प्रस्तुत गरेका थिए । बैठकमा सम्भावित सुरक्षा चुनौतीका विषयमा पनि छलफल भएको गृहमन्त्री अर्यालले संचारकर्मीलाई जानकारी दिएका छन् ।
राजनीतिक मुद्दाको सम्बोधनका लागि हामीले संवादको ढोका खुला राखेको बताउँदै अर्याललेसम्बद्ध पक्षहरूसँग हामी वार्ता गरी संवादबाटै समस्याको समाधान सरकारले चाहेको बताए ।
