अनलाइन डबली
काठमाडौँ । गएराति १० बजेबाट नेपाली सेना सडकमा निस्किएको छ । जेनजीको नाममा भएको आन्दोलनपछि लुटपाट र आगजनीका घटना बढ्दै गएपछि सेनाले सुरक्षा कमाण्ड हातमा लिएको हो ।
रातिबाटै सडकमा निस्किएको सेनाले विहानबाट गस्ती बढाएको छ ।
सेनाले घर र गल्लीबाहिर निस्किएका सर्वसाधारणहरूलाई विना काम बाहिर ननिस्किन आग्रह गरेको छ ।
आकस्मिक सेवामा संलग्नहरूलाई भने सोधपुछ र परिचयपत्रका आधारमा हिंडडुल गर्न छुट दिएको छ ।
जलिरहेका संसद भवन, सिंहदरबार, सर्वोच्च अदालतमा अहिले प्रवेशमा सेनाले रोक लगाएको छ ।
यसैबीच काठमाडौँका विभिन्न स्थानमा लुटपाटमा संलग्न रहेका २५ जनालाई सेनाले नियन्त्रणमा लिएको छ । हिजो राति वानेश्वारस्थित राष्ट्रिय बाणिज्य बैंक लुटपाटमा संलग्नलाई तितबरबितर गराउँदै ५ जनालाई नियन्त्रणमा लिएको थियो ।
सैनिक जनसम्पर्क तथा सूचना निर्देशनालयका अनुसार भक्तपुरकोे राधेराधेस्थित भाटभटेनी सुपरमार्केट, होटल हायात र बौद्ध इलाकाबाट लुटपाटमा संलग्न भएको अभियोगमा २१ जना पक्राउ परेको छ ।
