अनलाइन डबली
काठमाडौं । नेकपा (माओवादी केन्द्र) को पदाधिकारी बैठक सकिएको छ । बिहीबार पार्टी केन्द्रीय कार्यालय पेरिसडाँडामा बसेको पदाधिकारी बैठकपछि प्रवक्ता अग्निप्रसाद सापकोटाले बर्षायामका कारण स्थगित मध्यपहाडी लोकमार्ग केन्द्रीत अभियानलाई व्यवस्थित गर्ने निर्णय गरेको जानकारी दिए ।
माओवादीले अभियान यही भदौ २१ गतेबाट पुनः सुरु गर्न लागेको छ ।
त्यस्तै सरकारले जनताका मागहरू सम्बोधन नगरेको, भ्रष्टाचार दिनदिनै बढेको निष्कर्ष निकाल्दै बैठकले वर्षा र चाडबाड सकिएपछि सडक संघर्षको तयारी गर्ने निर्णय समेत गरेको सापकोटाले जानकारी दिए ।
‘‘सरकारले जनताका माग पूरा गरेन, भ्रष्टाचार पनि नियन्त्रण हुन सकेन । अब सडक संघर्षमा जानुपर्ने अवस्था आएको छ । बर्षा र चाडबाड सकिएपछि यी मुद्दा लिएर सडक संघर्षमा जान्छौं’ सापकोटाले भने ।
लोकतान्त्रिक गणतन्त्रात्मक समाजवाद र त्यसको साथसाथै समाजवादउन्मुख राज्यव्यवस्थाका स्वरूपहरू र त्यसका प्रष्ट दृष्टिकोणका बारेमा अब जनमत सिर्जना गर्दै जाने र भोलि हुने संघर्षमा त्यसलाई जोड्ने सापकाेटाले बताए ।
