अनलाइन डबली
काठमाडौँ । यमनको हुथी विद्रोहीले साउदी अरेबियाको तेल भण्डारमा नयाँ हमला गरेको छ । इरानी सञ्चारमाध्यमका अनुसार सोमबार विहान तेल भण्डारमा नयाँ हमलाको जिम्मा हुथीले लिएको छ ।
इरानी समाचार एजेन्सी तस्निमका अनुसार आभा र खामिस मुसैत क्षेत्रमा नयाँ हमला भएको हो । यो क्षेत्रमा हवाई आक्रमणको साइरन बजिरहेका सार्वजनिक भएको थियो ।
यसअघि पनि साउदीको पाइपलाइनमा ड्रोन हमला भएको थियो । तर, यसको जिम्मा कसैले लिएको थिएन् । गत शुक्रबार इराकबाट प्रहार गरिएको ड्रोन आक्रमणका कारण साउदी अरेबियाको पूर्व–पश्चिम तेल पाइपलाइन बन्द भएको छ ।
साउदी अरेबियाको नागरिक रक्षा संगठनले देशका चार सहरमा हवाई आक्रमण गर्ने चेतावनी जारी गरेको थियो । जाजान र नजरान प्रान्तका साथै आभा र खामिस मुसैत सहरका बासिन्दालाई सुरक्षा चेतावनी पालना गर्न साउदी सरकारले आग्रह गरेको थियो ।
साउदीमा हुथीको नयाँ हमला र खाडी क्षेत्रमा जहाजहरूमाथि भएका इरानी हमलापछि विश्वभर ऊर्जा आपूर्तिमा थप संकट पैदा भएको छ । सोमबार अन्तर्राष्ट्रिय बजारमा कच्चा तेलको मूल्य अहिलेसम्मकै बढी पुगेको छ ।
बजार खुल्दा प्रारम्भिक चरणमा ३ प्रतिशतभन्दा बढीले बढेको ब्रेल क्रुडको भाउ पछि २.७७ प्रतिशत (२.९० डलर) ले बढेर प्रतिब्यारेल १०७.५१ डलर पुगेको छ भने डब्लूटीआई फ्युचर्स पनि २.२७ प्रतिशतले बढेर प्रतिब्यारेल १०२.३२ डलरमा पुगेको छ ।
ऊर्जा आपूर्तिमा देखिएको यो अवरोधले गत हप्ता मात्रै तेलको मूल्य ८ प्रतिशतले बढेर जुलाईयता पहिलो पटक प्रतिब्यारेल १०० डलर नाघेको थियो ।
यसले होर्मुज जलमार्गलाई छलेर हुने तेल निकासी रोक्दा विश्वव्यापी तेल आपूर्तिको करिब ४ प्रतिशत हिस्सा जोखिममा परेको छ ।
