काठमाडौं । अमेरिकाको फ्लोरिडामा भएको गोलीकाण्डमा परी २ जना सर्वसाधारण नागरिक र २ जना संदिग्ध व्यक्तिको ज्यान गएको छ ।
समाचारमा जनाइएअनुसार बिहीबार सो गोलीकाण्ड भएको थियो । फ्लोरिडाको मियामीस्थित एक गहना पसलमा केही बन्दुकधारीले आक्रमण गरी गहना लुट्ने प्रयास गरेका थिए ।
त्यस क्रममा ती बन्दुकधारीले हानेको गोली लागेर त्यहाँ काम गर्ने एक जना कर्मचारी मारिएका छन् । त्यस लगत्तै उनीहरुले अपहरण गरी लगेका सोही पसलका सवारी चालक एक जनाको पनि ज्यान गएको बताइएको छ ।
प्रहरीले हानेको गोली लागेर गहन पसल लुट्न आएका २ जना बन्दुकधारी मारिएको बताइएको छ । केही सामान लुटेका उनीहरुले उक्त पसलकै सवारी साधनलाई नियन्त्रणमा लिएका थिए र सवारी चालकलाईसमेत नियन्त्रणमा लिएर उक्त गाडी आफूले चाहेको स्थानतर्फ लैजान बल गरेका थिए ।
भाग्ने क्रममा देखेर प्रहरीले गोली चलाएको थियो । गोली लागेर २ जना बन्दुकधारीको ज्यान गएको र गोलीकाण्डको बारेमा त्यहाँको प्रहरीले अनुसन्धान थालेको सुरक्षा अधिकारीहरुले जानकारी दिएका छन् ।
