काठमाडौं । १३ औं दक्षिण एसियाली खेलकुद साग प्रतियोगितामा साइक्लिङबाट पनि राम्रो सफलता नेपालले पाइरहेको छ ।
साइक्लिङबाट बुधबार दुईवटा स्वर्ण पदक जितेको नेपालले बिहीबार अर्को स्वर्ण थपेको छ । नेपालका लागि साइक्लिङको क्रस कन्ट्री स्पर्धामा नेपालकी लक्ष्मी मगरले स्वर्ण जित्न सफल भएकी छिन् ।
गोकर्णमा भएको साइक्लिङमा लक्ष्मीले क्रस कन्ट्रीको ४ किलोमिटरमा स्वर्ण जितेकी हुन् । यही स्पर्धाबाट नेपालकै उषा खनालले रजत पदक जितेकी छिन् ।
लक्ष्मीले निर्धारित दूरी १ मिनेट २०।२० सेकेण्डमा पूरा गर्दै स्वर्ण जितिन् । उषाले १ मिनेट ३५। ५२ सेकेण्डमा दुरी तय गरेर रजत जितिन् । यो स्पर्धामा भारतकी प्रनिता प्रफुल सोमनले निर्धारित दूरी १ मिनेट ३६। २९ सेकेण्डमा पूरा गर्दै रजत पदक जितिन् ।
बुधबार डाउनहिल स्पर्धामा राजेश मगर र निश्मा श्रेष्ठले स्वर्ण पदम जितेका थिए । बिहीबार नेपालले उसुबाट अर्को स्वर्ण जितेको थियो । निमा घर्तीमगरले उसुबाट स्वर्ण पदक जितेकी छिन् । साइक्लिङको तेस्रो स्वर्णसँगै १३ औं सागमा नेपालको स्वर्ण संख्या ३१ पुगेको छ ।
