काठमाडौं । अन्जली चन्दले क्रिकेटमा विश्वकिर्तिमान कायम गरेकी छिन् ।
१३ औँ दक्षिण एसियाली खेलकुद (साग) को महिला क्रिकेट अन्तर्गत पोखरा रंगशालामा भएको माल्दिभ्स विरुद्धको खेलमा उनले कुनै पनि रन नदिई ६ विकेट हात पारेकी छिन् ।
६ विकेट लिने क्रममा उनले ह्याट्रिक समेत गरिन् । विश्व क्रिकेटमा अहिलेसम्म कुनै पनि क्रिकेटरले रन नखर्चिकन ६ विकेट हात पार्न सकेका थिएनन् ।
सातौँ ओभरमा बलिङ गर्न आएकी उनले मेडन राख्दै ३ विकेट हात पारिन् । लगत्तै नवौं ओभरमा उनले कुनै पनि रन खर्च नगरि थप २ विकेट हात पारिन् । एघारौं ओभरमा उनले थप एक विकेट लिइन् । साथै ह्याट्रिक समेत पूरा गरिन् ।
टस जितेर पहिले ब्याट्रिङ गरेको माल्दिभ्सले १०.१ ओभरमा १६ रन बनाएको थियो । जवाफ ब्याटिङ गरेको नेपालले ०.५ ओभरमै लक्ष्य भेट्टायो ।
नेपालका लागि करुणा श्रेष्ठले १३ रन बनाइन् । नेपाललाई थप ४ रन एक्ट्रा प्राप्त भएको छ । दक्षिण नेपालले आगामी डिसेम्बर ४ मा बंगलादेश र डिसेम्बर ६ मा श्रीलंकासँग खेल्नेछ ।
