काठमाडौं । आज र भोलि भिटामिन ‘ए’ खुवाइँदैछ । स्वास्थ्य तथा जनसङ्ख्या मन्त्रालयले राष्ट्रिय कार्यक्रम बनाएर आज र भोली (यही कात्तिक २ र ३ गते) सो कार्यक्रम सञ्चालन हुँदैछ ।
मन्त्रालयका अनुसार ६ महिनादेखि पाँच बर्षसम्मका करिब २७ लाख बालबालिकालाई भिटामिन ‘ए’ क्याप्सुल, एक वर्षदेखि पाँच वर्षमुनिका २४ लाख बालबालिकालाई जुकाको औषधि (अल्वान्डाजोल), छ महीनादेखि दुई वर्षभित्रका चार लाख बालबालिकालाई बालभिटा र पाँच वर्षमुनिका २७ लाख बालबालिकाको पाखुराको नाप लिइने छ । बालबालिकाको पोषणको स्थिति पत्ता लगाउन पाखुराको नाप लिइने गरिन्छ ।
देशभरका ७५३ वटै पालिकाका बालबालिकालाई खुवाउने कार्यक्रम रहेको स्वास्थ्य सेवा विभाग, पोषण शाखाका प्रमुख केदार पराजुलीले जानकारी दिए । उनले ५२ हजार बुथमा बनाएको र सोही सङ्ख्यामा स्वास्थ्यकर्मी परिचालन बताए ।
मन्त्रालयले पछिल्लो समय सो कार्यक्रम स्थानीय तहलाई नै हस्तान्तरण गरिसकेको छ । मन्त्रालयले स्थानीय तहलाई प्राविधिक र अन्य समन्वयको मात्र सहयोग गर्दछ । कार्यक्रमका लागि करीब तीन करोड ५० लाख बजेट विनियोजन गरेको छ । ती दुई दिनमा परिचालन हुने महिला स्वयंसेविका तथा स्वास्थ्यकर्मीलाई दैनिक ४ सय रुपैयाँ भत्ताको व्यवस्था भएको मन्त्रालयले जनाएको छ ।
सन् १९९३ देखि भिटामिन ‘ए’ कार्यक्रम शुरुआत भएको थियो । विगत २६ वर्षमा कार्यक्रमले सकारात्मक प्रभाव परेको शाखा प्रमुख पराजुलीले बताए ।
