काठमाण्डौं । भारतको विहार प्रदेशअन्तर्गत पर्ने मुजफ्फरपुरमा इन्सेफ्लाइटिसका कारण मृत्यु हुनेको सङ्ख्या एक सय ३ पुगेको छ । श्रीकृष्ण मेडिकल कलेज (अस्पताल) मा मात्रै मृत्यु हुनेको संख्या ८५ पुगेको अस्पतालका प्रमुख डा सुनिल कुमार सिंहले जानकारी दिए । मुजफ्फरपुरको केजरीवाल अस्पतालमा थप एक जनाको मृत्यु भएपछि त्यहाँ मात्रै मृत्यु हुनेको सङ्ख्या १८ पुगेको छ।

इन्सेफ्लाइटिसबाट मृत्यु भएकाको परिवारलाई ४ लाख रुपैँया दिने विहार सरकारले घोषणा गरेको छ । रोग नियन्त्रणका लागि आवश्यक कार्य गर्न पनि स्वास्थ्य विभाग, जिल्ला प्रशासन र चिकित्सकलाई निर्देशन दिएको विहारका मुख्यमन्त्री नितिश कुमारले बताए ।
टाउको दुख्ने, उच्च ज्वरो आउनेलगायतका लक्षण देखिने यो रोग सरुवा रोग भएकाले पनि धेरैलाई असर गरेको चिकित्सकहरुले बताएका छन्।