काठमाण्डौ ।
भारत झारखण्डको सरायकेला खरसांवामा नक्सलवादीको आक्रमणबाट पाँचजना प्रहरीको मृत्यु भएको छ। शुक्रबार राति नक्सलवादीले आक्रमण गरेको र त्यसमा दुई सब इन्स्पेक्टर र तीन प्रहरी जवानको मृत्यु भएको भारतीय सञ्चारमाध्यमले जनाएका छन् ।
पश्चिम बंगालसँग जोडिएको तिरुलडीह क्षेत्रमा गाडीमा रहेका झारखण्डका प्रहरीमाथि चरमपन्थीले अन्धाधुन्ध गोली चलाएको प्रहरीले उल्लेख गरेको छ । कुकड साप्ताहिक हाटबाट फर्किएका प्रहरीलाई कुरेर बसेका नक्सलवादीले आक्रमण गरेका हुन् ।
सरायकेला खरसांवा जिल्लामा पछिल्लो एक महिनामा नक्सलवादीले गरेको यो चौथो आक्रमण हो । झण्डै १८ जनाको समूहमा रहेका नक्सलवादीले प्रहरीको गाडीले घेरेर अन्धाधुन्ध गोली चलाएको झारखण्डका प्रहरी प्रवक्ता एमएल मीणाले बताएको भारतीय सञ्चारमाध्यमले जनाएका छन् ।
मुख्यमन्त्री रघुवर दासले सामाजिक सञ्जाल ट्विटर मार्फत आक्रमणको निन्दा गरेका छन् ।
