काठमाडौं । नेपाल कम्युनिष्ट पार्टी (नेकपा) का अध्यक्ष प्रचण्डले जनयुद्धको जसअपजस लिन तयार रहेको बताएका छन् । उनले आफू मरेपनि सुख नपाउने भन्दै कारवाही भोग्न तयार रहेको बताए ।
काठमाडौंमा विस्तृत शान्ति सम्झौताको १३ वर्ष पुगेको अवसरमा द्वन्द्व पीडित साझा चौतारीसहितका संस्थाले गरेको कार्यक्रममा प्रचण्डले आफूले जनयुद्धलाइ शान्तिमा रुपान्तरण गर्न जोखिम मोलेको तर आफ्नो आलोचना भइरहेको बताए ।
कार्यक्रममा बोल्दै प्रचण्डले भने, “मैले मरे पनि सुख पाउँदिन जस्तो छ । मैले गरेको राम्रो कामको प्रशंसा र आलोचना गर्नेहरु मरेपछि हुने भए ।” जनयुद्ध आफ्नै पहलमा भएको बताउँदै जसअपजस लिन तयार रहेको भन्दै प्रचण्डले दोषी देखिए दण्ड भोग्न तयार रहेको समेत बताए ।
कार्यक्रममा बोल्दै प्रचण्डले शान्ति प्रक्रिया टुंग्याउने नाममा आममाफी आफुहरुले नचाहेको र आममाफीको कुरा पनि नगरेको बताए । “गम्भीर मानवअधिकार उल्लंघन र ज्यादति गर्नेहरुलाई दण्डको घेरा लगिन्छ । कार्वाही गरिन्छ । यसमा ढुक्क रहनुहोस्” प्रचण्डले भने ।
कार्यक्रमा ऐन संशोधन नगरी सत्य निरपण तथा मेलमिलाप आयोग र वेपत्ता छानबिन आयोग बनाइन खोजेकामा आपत्ति जनाएपछि प्रचण्डले ऐन संशोधन र आयोगलाई पूर्णता दिने बताए । उनले सत्य निरुपण तथा मेलमिलाप आयोगमा पुराना पदाधिकारी कसैलाई पनि नदोहार्याउने प्रतिवद्धता पनि जनाए ।
- फाइल फोटो
