अनलाइन डबली
काठमाडौँ । लामो समयदेखिको वायु प्रदुषण र खडेरीबीच हिजो रातिबाट देशका विभिन्न भागमा बर्षा भएको छ । असिना, हावा हुरीसँगै परेको चट्याङबाट तीन जनाको मृत्यु भएको छ । त्यस्तै एक दर्जनबढी घाइते भएका छन् ।
बुधवार राति डोटीको सायल गाउँपालिका–६ की ३३ वर्षीय कमला नागरी र बझाङको वित्थडचिर गाउँपालिका–३ का ७८ वर्षीय धौले बोहराको मृत्यु भएको प्रहरीले जनाएको छ ।
त्यसैगरी रोल्पाको रोल्पा नगरपालिका १० कुटिबाङ घर भई सुनिलस्मृति गाउँपालिकास्थित आफन्तको घरमा बस्न गएकी १५ वर्षीया किशोरीको मृत्यु भएको लुम्बिनी प्रहरी कार्यालयले जनाएको छ ।
चट्याङबाट डोटीमा १० वर्षीय तारा नागरी, ८ वर्षीय अविशेक नागरी, ६ वर्षीय अबि नागरी, ३ महिनाका शंकर नागरी, ४० वर्षीया तारा नागरी, ८० वर्षीया काली दमाई र ६ वर्षीय खुशी नागरी घाइते भएका छन् ।
प्रहरीका अनुसार बर्षासँगै ठाउँठाउँमा पहिरो खस्दा देशका ९ वटा सडक अवरुद्ध हुनेको साथै विद्युत सेवा पनि प्रभावित भएको छ । हावाहुरी र पानीसँगै परेको चट्याङले बझाङको खोड्पे–बझाङ ३३ केभी राष्ट्रिय प्रसारण लाइनमा क्षति पुर्याएपछि विद्युत सेवा अवरुद्ध भएको छ ।
