अनलाइन डबली
काठमाडौँ । विवादित व्यवसायी दुर्गा प्रसाईँलाई जहाजमार्फत काठमाडौँ ल्याइएको छ । राज संस्थाको माग गर्दै तीनकुनेमा गरेको प्रदर्शनपछि फरार प्रसाईँले भारतीय प्रहरीसमक्ष आत्मसमर्पण गरेको बताएका थिए ।
भारतीय प्रहरीको सहयोगमा प्रसाईँलाई शुक्रबार विहान झापाको भद्रपुर विमानस्थल हुँदै काठमाडौँ ल्याइएको हो । काँकडभिट्टा नाकामा प्रसाईँका समर्थक भेला भएपछि भद्रपुर विमानस्थलबाट बुद्ध एयरको जहाजमार्फत काठमाडौँ ल्याइएको प्रहरीले जनाएको छ ।
सुरक्षा स्रोतका अनुसार उनलाई शुक्रबार बिहान प्रदेश नम्बर १–०१–००२ च ३७९३ गाडीमा भारततर्फबाट नेपाली क्षेत्रमा ल्याइएको थियो । बिहान १० बजेर ७ मिनेटमा उनलाई सीमा क्षेत्रमा ल्याइएको बताइएको छ । तर, प्रहरीले भने उनलाई शुक्रबार नै भद्रपुर क्षेत्रबाट पक्राउ गरिएको दाबी गरेको छ । यसअघि प्रसाईंको सचिवालयले उनले आसाम प्रहरी समक्ष आत्मसमर्पण गरेको बताएको थियो ।
नेपाल र भारतबीचमा सुपुर्दगी सन्धि नभएकाले एकअर्काको देशमा पक्राउ परेका आरोपितहरुलाई अनौपचारिक रूपमा लेनदेन गर्ने गरिँदै आएको छ ।
चैत १५ गते काठमाडौँको तीनकुनेमा भएको हिंसात्मक प्रदर्शनका कमाण्डर प्रसाईँलाई ज्यानमा मार्ने उद्योग, राज्य विरुद्ध र संगठित अपराधसम्बन्धी कसूरमा छानबिन थप अनुसन्धान गर्ने प्रहरीले तयारी गरेको छ ।
प्रसाईँलाई आजै म्याद थप गरिने समेत बताइएको छ ।
