अनलाइन डबली
काठमाडौं । नेपाल काँग्रेस नेतृ पुष्पा भुसाल उपसभामुख हुने भएकी छन् । सत्ता गठबन्धनमा भएको सहमतिअनुसार भुसाललाई काँग्रेसले उपसभामुखको उम्मेदवारी बनाउने निर्णय गरेको थिइो । उपसभामुख चयन प्रक्रिया सुरु भएर भोली (शुक्रबार) सकिनेछ ।
प्रतिनिधि सभाका उपसभामुख चयनको लागि संसद सचिवालयले सार्वजनिक गरेको कार्यतालिकाअनुसार बिहीबार बिहान ११ देखि अपराह्न १ बजेसम्म मनोनयनको समय तोकिएको छ । उम्मेदवारको नामावली प्रकाशन र मतदान पनि आजै हुनेछ । त्यस्तै शुक्रबार अपराह्न ३ बजेको बैठकमा उपसभामुख चयनको प्रस्तावमाथि मतदान हुनेछ ।
तत्कालिन नेकपाको बेला २०७६ माघ ६ गते तत्कालीन उपसभामुख डा. शिवमाया तुम्बाहाङ्फेले राजीनामा दिएकी थिइन् । प्रतिनिधिसभाको सभामुख र उपसभामुख एउटै पार्टी र लिङ्गको हुन नपाइने संवैधानिक व्यवस्था अनुसार तत्कालिन नेकपाले उपसभामुखको चुनाव गराएको थिएन् । नेकपाले सभामुखमा अग्निप्रसाद सापकोटालाई उम्मेदवार बनाउने निर्णय गरेसँगै तुम्बाहाङ्फेले राजीनामा दिएकी थिइन् । पछि उनलाई मन्त्री पनि बनाइएको थियो ।
गठबन्धन दला नेपाली काँग्रेस ६१, नेकपा माओवादी केन्द्रको ४९, नेकपा एकीकृत समाजवादी २३, जनता समाजवादी पार्टीका २१ र राष्ट्रिय जनमोर्चाको १ गरी १५५ मत छ भने नेकपा एमालेको ९८ भएपनि कतिले एमाले उम्मेदवारलाई अरु कुन दलले समर्थन गर्ने भन्ने खुलेको छैन । सत्ता गठबन्धनको मतअनुसार भुसाल उपसभामुख हुने पक्का भएको हो ।
यसअघि नेकपा एमालेकी शिवमाया तुम्बाहाङ्फेसँग पराजित बनेकी थिइन् । ०७४ चैतमा भएको उपसभामुखको निर्वाचनमा तुम्वाहाङ्फे २०१ मतका साथ विजयी हुँदा भुसाल ५८ मत प्राप्त गरेर पराजित भएकी थिइन् । अहिले भुसाल काँग्रेसको सचेतक छन् ।
सत्ता गठबन्धन भन्दा बाहिर रहेको लोसपा पनि सत्ता गठबन्धनसँगै नजिक छ तर लोसपाले एमालेलाई साथ दिँदा पनि गठबन्धनकै उम्मेदवार भुसालले जित्ने निश्चित जस्तै छ ।
