अनलाइन डबली
काठमाडौं । नेकपा (एकीकृत समाजवादी) नयाँ मन्त्रीको नाम प्रधानमन्त्री शेरबहादुर देउवालाई बुझाएको छ । आजै सरकारबाट सबै मन्त्रीलाई फिर्ता बोलाएर एकीकृत समाजवादीले नयाँ अनुहार सरकारमा पठाएको छ ।
नेताहरुका अनुसार भवानी खापुङ स्वास्थ्य तथा जनसंख्या, जीवनराम श्रेष्ठ संस्कृति, पर्यटन तथा नागरिक उड्डयन, मेटमणि चौधरी सहरी विकास, शेरबहादुर कुँवर श्रम, रोजगार तथा सामाजिक सुरक्षा मन्त्रीमा एकीकृत समाजवादीले पठाएको छ । त्यस्तै, स्वास्थ्य तथा जनसंख्या राज्यमन्त्रीमा हीरा केसीलाई पठाइएको छ ।
यसअघि एकीकृत समाजवादीबाट स्वास्थ्यमा विरोध खतिवडा, पर्यटनमा प्रेमबहादुर आले, सहरी विकासमा रामकुमारी झाँक्री, श्रममा कृष्णकुमार श्रेष्ठ मन्त्री थिए । स्वास्थ्य राज्यमन्त्रीमा भवानी खापुङ थिए ।
राष्ट्रिय सभा सदस्य समेत रहेका शेरबहादुर कुँवर अछामबाट एकीकृत समाजवादीको तर्फबाट मन्त्री हुने पहिलो हुन् । यसअघि मन्त्री हुने चर्चा चलेपनि अन्तिममा आएर नाम काटिएको थियो ।
अाइतबार बसेकाे स्थायी समिति बैठकले सबै मन्त्रीलाई फिर्ता बोलाउने निर्णय गरेको थियाे । सम्मानित नेता झलनाथ खनालले सचिवालय समितिको बैठकपछि सबै मन्त्रीलाई फिर्ता बोलाउने निर्णय गरेको संचारकर्मीलाई जानकारी दिएका थिए । उनले ६–६ महिना मन्त्री बन्ने सहमति अनुसार फिर्ता बोलाएको बताए ।
“उहाँहरुले मन्त्री भएको ६ महिना भइसक्यो । पहिले नै ६–६ महिना मन्त्री बन्ने सहमति भएको थियो । त्यसैले सधन्यवाद फिर्ता बोलाउने निर्णय गरियो” खनालले भने । तर पार्टीकाे निर्देशन र अपेक्षाकृत काम नगरेका कारण मन्त्रीलाइ फिर्ता बाेलाइएकाे एक नेताले बताए ।
