काठमाडौं । विश्व बजारमा आएको पछिल्लो उथुलपुथलसँगै नेपालमा सुनको भाउ पनि अहिलेसम्मकै उच्चबिन्दूमा पुगेको छ । आयतमा कोटा र रुस–युक्रेन समस्यासँगै सुनको मूल्य बढेको हो ।
बुधाबर नेपाली बजारमा सुनको मूल्य अहिलेसम्मकै उच्च बिन्दूमा पुगेको छ । नेपाल सुन चाँदी व्यवसायी संघका अनुसार प्रतितोला १ लाख ५ हजार ५ सय रुपैयाँमा पुगेको छ । आजै एकै दिन तोलामा २५ सय रुपैयाँले बढेर यो रेकर्ड बनेको हो ।
मंगलबार नेपाली बजारमा सुनको मूल्य तोलामा एक लाख ३ हजार रुपैयाँ थियो ।
यसअघि पनि कोभिड १९ का कारण भएको लकडाउनको असरले गएको वर्षको साउन महिनामा सुनको भाउ १ लाख ३ हजार ५ सय रुपैयाँसम्म पुगेको थियो । त्यसयता निरन्तर घट्दै प्रतितोला ८८ हजार रुपैयाँसम्म आइपुगेको थियो ।
सुन व्यसायी तेजरत्न शाक्यका अनुसार सुनको मूल्य अझै बढ्नेछ । सुनसँगै चाँदीको भाउ पनि बढेको छ । बुधबार तोलामा ४० रुपैयाँले बढेर चाँदी आज १४ सय ५० रुपैयाँ पुगेको छ ।
