काठमाडौं । कलाकार निशाको आजै अन्त्येष्टी गरिने भएको छ । बुधबार साँझ उपचारको क्रममा निशाको निधन भएको थियो । नर्भिक अस्पतालमा उपचाररत मोडल तथा कलाकार घिमिरेको बुधबार साँझ निधन भएको हो । अस्पतालका अनुसार उपचारका क्रममा बुधबार साँझ ६ः५१ बजे निशाको निधन भएको थियो ।
अस्पतालका प्रमुख कार्यकारी अधिकृत अजय मिश्रका अनुसार अस्पतालको सीसीयूमा लगातार राखी उपचार गरिएको र सबै प्रयासका बाबजुद मोडल घिमिरेको निधन भएको छ । अस्पतालले घिमिरेको निधनप्रति दुःख व्यक्त समेत गरेको छ ।
भारतमा दुर्घटना परी घाइते भएकी निशालाई गम्भीर अवस्थामा घरमै रहेका बेला नर्भिक अस्पतालले २०७८ जेठ २७ गते उद्धार गरेको थियो । उनको सम्पूर्ण उपचार अस्पतालले बेहोर्दै आएको थियो । उनलाई सीसीयूमा राखेर उपचार गर्दा पनि स्वास्थ्य अवस्थामा अपेक्षित सुधार आउन नसकेको अस्पतालले जनाएको थियो ।
खाना पनि पाइपबाट खुवाउने गरिएको थियो भने उनका शरीरमा रहेका घाउहरु समेत लामो समयसम्म पुरिन सकेका थिएनन् । गम्भीर अवस्थामै रहेकी घिमिरेको मुटु र मृगौलाले काम गर्न छाडेपछि बुधबार बिहानदेखि अवस्था गम्भीर बन्न पुगेको थियो ।
निशाको मृत्युको खबरसँगै कलाकारहरुले दुःख व्यक्त गरेका छन् ।
