काठमाडौं । नेकपा (एमाले)बाट भरखरै पार्टी विभाजन गरेका पूर्वप्रधानमन्त्री माधवकुमार नेपालले निर्वाचन आयोगमा दर्ता लागि पेश गरेको नयाँ पार्टीका नाम परिवर्तन गरेका छन् ।
नेपाल अध्यक्ष रहेको पार्टीको नेपाल कम्युनिस्ट पार्टी एकीकृत समाजवादी रहने भएको छ । निर्वाचन आयोगले पार्टीको नाममा विशेषण झुण्ड्याएर अर्को दल दर्ता गर्न नमिल्ने जानकारी दिएपछि नाम परिवर्तन गरिएको हो ।
बुधबार नेकपा एमालेबाट अलग भएको नेपाल समूहले नेकपा एमाले समाजवादी दल दर्ताका लागि निर्वाचन आयोगमा निवेदन दिएका थिए । तर, यसअघि नै सर्वोच्च अदालतले २३ फागुन एउटा पार्टीको नाममा विशेषण झुण्ड्याएर अर्को दल दर्ता गर्न नमिल्ने फैसला गरेको थियो ।
राजनीतिक दलसम्बन्धी अध्यादेशअनुसार नियमावली अनुसार शुक्रबार नयाँ निवेदन दिँदा नाम पनि फेरिएको छ । नेकपा एकीकृत समाजवादी नाम प्रस्ताव गरिएको छ भने ९५ सदस्यीय केन्द्रीय कमिटीलाई विस्तार गरेर ११५ पु¥याइएको छ । चुनाव चिन्ह भने तय भएको छैन ।
त्यसैगरी महन्थ ठाकुर पक्ष समूहले पनि नयाँ पार्टीको परिर्वतन गरेको छ । अब ठाकुरको पार्टीको नाम लोकतान्त्रिक समाजवादी रहने भएको छ । ठाकुरले पनि बुधबार नै निर्वाचन आयोगमा नयाँ दल दर्ताको लागि निवेदन दिएका थिए ।
सरकारले पार्टीको केन्द्रीय समिति वा संसदमा २० प्रतिशत बहुमत पुर्याएपछि ठाकुरले जनता समाजवादी पार्टी नेपाल (लोकतान्त्रिक) दर्ताका लागि निर्वाचन आयोगमा निवेदन दिएको थियो ।
ठाकुरले कार्यकारिणी समितिमा ७ जना महिला थपेर ३१ सदस्यीय बनाएका छन् ।
