काठमाडौँ । कोरोना भाइरस संक्रमणबाट नेपाल कम्युनिष्ट पार्टीकी नेतृ सावित्रा दुरा ‘आस्था’ की आमाको ज्यान गएको छ । अन्तरिम व्यवस्थापिका सदस्य समेत रहेकी आस्थाकी आमा मनकुमारी गुरुङको उपचारको क्रममा सोमबार विहान निधन भएको हो ।
आमाको ६७ वर्षीय उमेरमा आज विहान २ बजे पोखरामा उपचारका क्रममा निधन भएको पारिवारिक स्रोतले जनाएको छ । उनलाई गत जेठ ३ गते कोरोना सङ्क्रमण पुष्टि भएपछि जेठ ५ गतेदेखी उपचारका निम्ति अस्पताल भर्ना गरिएको थियो ।
तनहुँको व्यास नगरपालिका–६ शिशाघाट निवासी स्व गुरुङका एक छोरा दिन बहादुर दुरा र तीन छोरी लक्ष्मी गुरुङ, सावित्रा दुरा ‘आस्था’ र गायत्री गुरुङ ‘कुशुम’ छन् । आमा मनकुमारीकी दुई छोरी आस्था र गायत्री राजनीतिमा सकृय छन् । आस्था नेकपाकी केन्द्रीय सदस्य छन् भने बहिनी गायत्री नेपाल कम्युनिष्ट पार्टी (माओवादी केन्द्र) गण्डकी प्रदेश सदस्य तथा प्रदेश सभा संसदीय दलका प्रमुख सचेतक छन् ।
यसैबीच नेपाल कम्युनिस्ट पार्टीका महासचिव विप्लवले नेकपाकी केन्द्रीय सदस्य सावित्रा दुरा ‘आस्था’ की ममतामयी आमा मनकुमारी दुराप्रति हार्दिक श्रद्धाञ्जली प्रकट गरेका छन् । महासचिव विप्लवले आस्थालगायत शोकसन्तप्त परिवारप्रति हार्दिक समवेदना पनि व्यक्त गरेका छन् ।
‘हाम्रो महान् तथा जनप्रिय पार्टी नेपाल कम्युनिस्ट पार्टीकी केन्द्रीय सदस्य क। सावित्रा दुरा ‘आस्था’ की ममतामयी आमा मनकुमारी दुराको कोरोना सङ्क्रमणका कारण आज बिहान भएको दुःखद् र असामयिक निधनले हामीलाई दुःखी बनाएको छ । मृतक आमा मनकुमारी दुराप्रति हाम्रो पार्टी हार्दिक श्रद्धाञ्जली अर्पण गर्दछ । साथै, केन्द्रीय सदस्य क. आस्थालगायत सपरिवारमा गहिरो समवेदना प्रकट गर्दछ” विप्लवले जारी गरेको विज्ञप्तिमा भनिएको छ
नेपालमा कोरोना भाइरस संक्रमणबाट आइतबार १०९ जनाको ज्यान गएको थियो । पछिल्ला दिनमा संक्रमितभन्दा निको हुनेको संख्या बढिरहे पनि ज्यान गुमाउनेको संख्यामा भने कमी आएको छैन ।
आइतबार देशभर ४ हजार ३६९ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जनाएको थियो । कुल १० हजार ९८६ जनामा पीसीआर परीक्षण गर्दा ३७०२ र १७८४ एन्टिजेन परीक्षणमा ६६७ जना गरी ४,३६९ जनामा संक्रमण पुष्टि भएको थियो ।
त्यस्तै, आइतबार देशभर ६ हजार २०५ कोरोना संक्रमणमुक्त भएका छन्
