काठमाडौँ । नेपालमा कोरोना भाइरस संक्रमण दिनदिनै बढिरहेका छन् । स्वास्थ्य तथा जनसंख्या मन्त्रालयका अनुसार शनिबार थप ३३७ जनामा कोरोनाभाइरस संक्रमण पुष्टि भएको छ । शुक्रबारभन्दा संक्रमितको संख्या बढेसँगै चिन्ता र चाँसो बढेको छ ।
छिमेकी भारतमा कोरोनाको दोस्रो लहर भयावह बनिरहेको बेला नेपालमा पनि संक्रमितको संख्या बढिरहेको छ । सीमामा कडाई गर्ने भनिएपनि फितलो भइरहेको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ३ हजार ५३२ जनाको पीसीआर परीक्षण गर्दा ३३७ जनामा संक्रमण पुष्टि भएको हो । यस्तै सो बीचमा १ जनाको ज्यान गएको छ । त्यस्तै, शनिबार थप १५१ जनाले कोरोना जितेर सामान्य जीवनमा फर्किएको मन्त्रालयले जनाएको छ ।
यससँगै देशभर कोरोना संक्रमितको संख्या २ लाख ७९ हजार ७२५ पुगेको छ भने निको हुनेको संख्या २ लाख ७३ हजार ८८६ पुगेको छ । यस्तै हालसम्म ३ हजार ३९ जनाको मृत्यु हुँदा सक्रिय संक्रमित २८ सय जना रहेका छन् ।
यसैबीच प्रधानमन्त्री केपी शर्मा ओलीले लकडाउन गर्नु नपरोस् भन्दै स्वास्थ्य मापदण्डको पालना गर्न आग्रह गरेका छन् । हिजो मात्रै स्वास्थ्य तथा जनसंख्या मन्त्रालयले विद्यालय, फिल्म, पाटी प्यालेस बन्द गर्न सुझाव दिएको थियो । त्यस्तै, एकै ठाउँमा २५ जनाभन्दा बढी भेला हुन रोक लगाउन समेत सरकारलाई सिफारिस गरेको थियो ।
