News Portal

मंसिर २५ गते देशभर प्रदर्शन गर्ने क्रान्तिकारी माओवादीको निर्णय, प्रतिबन्ध फिर्ता गर्न माग

डबली संवाददाता२०७७ मंसिर १३ गते
९९ पटक

काठमाडौँ । नेकपा (क्रान्तिकारी माओवादी) ले यही मंसिर २५ गते देशभर विरोध प्रदर्शन गर्ने निर्णय गरेको छ । नेकपामाथिको प्रतिबन्ध फिर्तालगायतका माग राखेर क्रान्तिकारी माओवादीले काठमाडौंसहित देशका सबै प्रदेशहरुमा विरोध प्रदर्शन गर्ने निर्णय गरेको हो ।

हालै सम्पन्न पोलिटव्यूरो बैठकका निर्णय सार्वजनिक गर्दै महासचिव मोहन वैद्यले भारतद्वारा कब्जा गरिएको लिम्पियाधुरासहितको भूभाग फिर्ता, एमसीसीको विरोध, भ्रष्टाचार, महँगी, बालिका–महिला बलात्कार तथा हत्या, मजदुरहरुको निष्कासन तथा कटौतीको विरोध, किसानहरुका लागि मलखाद तथा उत्पादित वस्तुको बजार एवम् सहुलियत ऋणको व्यवस्था, स्वदेशमै रोजगारीको सुनिश्चितता, शिक्षा तथा स्वास्थ्यको राष्ट्रियकरण, मजदुर, किसान, महिला, दलित, आदिवासी जनजाति, मधेसी, मुस्लिम सहितका उत्पीडित वर्ग तथा जनसमुदायका हक, हित तथा जनजीविकाका विषयलाई लिएर स्वतन्त्र तथा संयुक्त रुपमा विभिन्न प्रकारका सङ्घर्ष तथा आन्दोलन सञ्चालन गर्ने जानकारी गराएका छन् ।

त्यस्तै बैठकले विप्लव नेतृत्वको नेकपामाथिको प्रतिबन्ध हटाउन, उनीहरुले उठाएका मुद्दालाई राजनीतिक रुपमा लिन र कारागारमा रहेका नेता-कार्यकर्ताको रिहाइ गर्न माग समेत‍ गरेको छ । औपचारिक रुपमा पहिलो पटक क्रान्तिकारी माओवादीदले नेकपामाथिको प्रतिबन्ध फिर्ताको आजाव उठाएको छ ।

त्यसैगरी बैठकले वर्तमान सरकार भ्रष्टाचारसहित विभिन्न काण्डै काण्डमा मुछिएको, भारतद्वारा अतिक्रमित कालापानी सहितको नेपाली भूभाग फिर्ता गराउन गम्भीर नदेखिएको, नयाँ नक्सा र क्षेत्रफल समेटी तयार गरिएको पाठ्यपुस्तकको वितरणमा रोक लगाएको, कोभिड–१९को महामारीले तड्पिएका विभिन्न वर्गका जनतालाई समुचित राहत प्रदान गर्ने तथा जनस्वास्थ्यप्रति गम्भीर बन्ने दायित्वबाट पन्छिएको र जटिल बन्दै आएका राष्ट्रियता, जनतन्त्र र जनजीविकाका समस्याहरुको सम्बोधन गर्न असफल भएको निष्कर्ष निकालेको छ ।

यसैगरी प्रतिवेदनमा मार्क्सवाद–लेनिनवाद–माओवाद वा विचारधारा मान्ने, नयाँ जनवाद तथा वैज्ञानिक समाजवाद अङ्गीकार गर्ने क्रान्तिकारी कम्युनिस्ट सङ्गठन, समूह र व्यक्तित्वहरुलाई वार्ता तथा संवादको प्रक्रियामा अगाडि बढ्न आह्वान गरिएको छ ।

प्रतिकृया दिनुहोस्