News Portal

  • मदिरा सेवन गरी आफ्नै घरमा आगजनी, श्रीमतीको घरभित्रै जलेर मृत्यु

    १८२ पटक

    दार्चुला । नौगाड गाउँपालिका-२ सुण्डमुण्डुमा एक जनाले अत्यधिक मदिरा सेवन गरी आफ्नै घरमा आगजनी गरेका छन् ।

    ३२ वर्षिय शेरसिंह बडालले घरमा आगो लगाएपछि सामान निकाल्न भित्र गएकी उनकी श्रीमती ३० वर्षिय विमला बडालको घरभित्रै जलेर मृत्यु भएको छ ।

    शनिबार राति १२ बजे मदिरा सेवन गरी घर पुगेका उनले घर परिवारसँग झगडा गरेका थिए । घरमा आएर झगडा गरेपछि पूरै परिवार घर छाडेर जङ्गल भागेको नौगाड गाउँपालिका–२ का वडा सदस्य जयभानसिंह ठगुन्नाले बताए ।

    घरमा कोही नभएको भन्दै उनले आफू सुत्ने कोठामा गएर आगो सल्काएका थिए । घरमा आगो बलेको देखेपछि घर छाडेर भागेकाहरु फर्किएका थिए । उनकी श्रीमती घरभित्रको सामान बाहिर निकाल्न भित्र पसेकी थिइन् । घरभित्रको सामान निकाल्ने क्रममा आगोमा जलेर उनको घटनास्थलमै मृत्यु भएको उनले बताए ।

    आगो लागेको घर भित्रबाट बाहिर निस्कन नसक्दा उनको जलेर मृत्यु भएको हो । बुवा बहादुर बडाल र आमा मङ्गलीदेवी बडाल आगो निभाउने मान्छे खोज्न गाउँ पसेका थिए ।

    घटनाको अवस्था बुझ्न प्रहरी घटनास्थल पुगेको छ । आगो लगाएर परिवारको हत्या गरेको भए पनि के कति कारणले झै–झगडा भयो, आगो लगाउने स्थितिसम्म कसरी पुगे भन्ने अनुसन्धानपछि खुल्ने प्रहरीको भनाई छ ।

    आगो स्थानीयवासीले रातभर लगाएर नियन्त्रणमा लिएका थिए । मृतकको शव परीक्षणका लागि जिल्ला अस्पताल ल्याउने तयारी भइरहेको छ ।

    प्रतिकृया दिनुहोस्