काठमाडौँ । सरकारले झूटो विवरण पेस गरी नेपाली नागरिकता लिने ५ भारतीयको नागरिकता रद्द गरेको छ । जिल्ला प्रशासन कार्यालय सप्तरीबाट जीवनकुमार सिंह, धनुषाबाट धमेन्द्र ठाकुर र अजयकुमार ठाकुर, रौतहटबाट जमुना राउत भनिने यमुना सिंह र कृपाली राउत भनी चिनिने कृपाली सिंहले नागरिकता बनाउन झूटो विवरण पेस गरेको भन्दै उनिहरुको नागरिकता रद्द गरेको हो ।
‘झूटो विवरण पेस गरी नागरिकता लिनेलाई अब कारबाही अघि बढाइने सञ्चार तथा सूचना प्रविधिमन्त्री गोकुल बाँस्कोटाले जानकारी दिए । विवरण पूरा नगरी नागरिकता वितरण गर्नेलाई पनि कारबाही गरिने गृह मन्त्रालयका प्रवक्ता रामकृष्ण सुवेदीले बताए ।
तराईका विभिन्न जिल्लामा भारतीय नागरिकलाई नेपाली नागरिकता दिने गरेको यो घटना पहिलो भने होइन । यसअघि पनि विभिन्न समयमा भारतीय नागरिकले लिएका नागरिकता सरकारले रद्द गर्ने गरेको छ ।