Dabali News

ओली-प्रचण्ड, बादलविरुद्ध ‘विद्रोही’ जनमुक्ति सेना भगतले हाले सर्वोच्चमा मुद्दा

२१ मंसिर

काठमाडौं । प्रधानमन्त्री तथा (नेकपा)का अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’विरुद्ध सर्वोच्च अदालतमा मुद्दा दायर भएको छ । जनयुद्धको क्रममा तत्कालिन शाही नेपाली सेनाबाट विद्रोह गरी जनमुक्ति सेनामा प्रवेश गरेका मोरङका झलकुमार भगतले ओली–दाहालसहित २१ जनाविरुद्ध मुद्दा दायर गरेका छन् ।

मोरङको ग्रामथान गाउँपालिका–३ स्थायी घर भएका भगतले २०६२ साल साउन ८ गते हतियारसहित जनमुक्ति सेनामा प्रवेश गरेका थिए । शान्ति प्रक्रियासँगै भगत वाइसीएलको जिम्मा लिएर बाहिर निस्केका थिए ।

माओवादी पार्टीमा आएको विभाजनसँगै भगत विप्लवले नेतृत्व गरेको नेपाल कम्युनिस्ट पार्टीमा आवाद्ध भएका थिए । चुनाव विरोधी गतिविधिमा संलग्न भएको आरोपमा प्रहरीले भगतलाई २०७४ मंसिर ८ गते राति आफ्नै निवासमा सुतिरहेका बेला गिरफ्तार गरेको थियो । प्रहरीले भगतलाई नेपाली सेनाको पूर्वी पृतना इटहरीको जिम्मा लगाएको थियो ।

सेनाले भगतलाई भगौडा भन्दै २०७४ पुस १७ मा सर्वस्वसहित जन्मकैदको सजाय तोकेको थियो । हाल मकवानपुरको भीमफेदी कारागारमा रहेका भगतले आफूलाई विस्तृत शान्ति समझौता, तत्कालिन सात राजनीतिक दल र विद्रोही माओवादीबीच भएको सहमति लगायतको भावनाविपरीत फैसला सुनाइएको दाबी गर्दै सर्वोच्चमा रिट दायर गरेका हुन् ।

रिटमा प्रधानमन्त्री ओलीसहित शान्ति सम्झौताका हस्ताक्षरकर्ता तत्कालीन नेकपा माओवादी र हाल नेकपाका अध्यक्ष पुष्पकमल दाहाल ‘प्रचण्ड’, गृहमन्त्री रामबहादुर थापा ‘बादल’, प्रधानसेनापति पूर्णचन्द्र थापा, प्रहरी महानिरीक्षक सर्वेन्द्र खनालसहित २१ जनालाई विपक्षी बनाइएको छ ।

भगतको पक्षमा वरिष्ठ अधिवक्ताहरु कृष्णप्रसाद भण्डारी, शम्भु थापा, हरि फुयाँल, रमणकुमार श्रेष्ठ, गोविन्द बन्दी, बालकृष्ण न्यौपाने, उपेन्द्रकेसरी न्यौपाने, तुलसी भट्ट, शेरबहादुर केसी, रामप्रसाद श्रेष्ठ र एकराज भण्डारीले बहस गर्ने बताइएको छ ।

तत्कालिन नेकपा (माओवादी)का अध्यक्ष तथा जनमुक्ति सेनाका सर्वोच्च कमाण्डर प्रचण्डको अाह्वानमा भगतले शाही सेनाबाट अत्याधुनिक हतियारसहित विद्रोह गरी जनमुक्ति सेनामा भर्ती भएका थिए । त्यति बेला माओवादीले भगतको भव्य सम्मान र स्वागत गरेको थियो ।

Ad
Ad
Ad

डबली मिडिया प्रा.लि.द्वारा सञ्चालित डिजिटल न्युज पोर्टल अनलाइन डबली डटकम निरन्तर चलिरहेको छ ।
हामीले खासगरी खोजमूलक समाचारलाई स्थान दिने गरेका छौं । सन्तुलित विचार हाम्रो अनलाइनको प्राथमिकता हो ।

डबली मिडिया प्रा.लि. द्वारा संचालित 

अनलाइन डबली डटकम को लागि

अध्यक्षः दिपेन्द्र रावल

सम्पादकः धनन्‍जय बुढा

दर्ता नं. १५४/०७३-७४

Dabali Media
Anamnagar Kathmandu
Phone
01-4771244
Email
[email protected]
[email protected]