Dabali News

कृषि र पशुपालनलाई व्यावसायिक बनाउन ‘कृषि ज्ञान केन्द्र’ को स्थापना

१८ असोज

काठमाडौं । सप्तरी र सिरहा जिल्ला हेर्ने गरी राजविराजमा ‘कृषि ज्ञान केन्द्र’ स्थापना गरिएको छ ।

कृषकलाई सहयोग पुर्याउने उद्देश्यले प्रदेश नं २ को सरकारले भूमि व्यवस्था, कृषि तथा सहकारी मन्त्रालयअन्तर्गत स्थापना गरिएको केन्द्रको बुधबार प्रदेशको भूमि व्यवस्था, कृषि तथा सहकारीमन्त्री शैलेन्द्रप्रसाद साहले उद्घाटन गरेका हुन् ।

साविकको जिल्ला कृषि विकास कार्यालयमा नयाँ नामसहित स्थापना गरिएको कार्यालयको उद्घाटन गर्दै मन्त्री साहले नयाँ सोचका साथ अगाडि बढी किसानका समस्या समाधानमा अग्रसर हुन कर्मचारीलाई निर्देशन दिए ।

मन्त्रालयले केन्द्रलाई आवश्यक सहयोग गर्ने र केन्द्रले किसानलाई सहयोग गर्नुपर्ने भन्दै उनले ३ महीनाभित्र हुने अनुगमनमा किसानले सुविधा नपाए कारवाहीका लागि तयार रहन चेतावनी दिए ।

पहिलेभन्दा बढी व्यवस्थित ढङ्गले सञ्चालित हुनुपर्ने भन्दै प्रदेश मन्त्रालयअन्तर्गत मलखादको टेण्डर प्रक्रिया भएमा मात्र कमिशनको खेल अन्त्य भई सप्तरी र सिरहाका किसानले समयमै मलखाद पाउने बताए । कूल ४८ कर्मचारी रहेको जिल्ला कृषि विकास कार्यालय विस्थापित गरी १७ दरबन्दी भएको केन्द्रले दुई जिल्लामा सेवा पुर्याउन कठिनाइ हुने कर्मचारीले बताए । पुरानो जिल्ला पशु सेवा कार्यालयमा नयाँ नामसहितको पशु सेवा विज्ञ सम्पर्क केन्द्रको कार्यालय उदघाटन गरिएको छ । पशु सेवा विज्ञ केन्द्र भने सिरहामा रहने छ ।

मन्त्रालयले प्रदेशभित्र ६ कृषि ज्ञान केन्द्र तथा ६ पशु सेवा विज्ञ केन्द्र स्थापना गरी कृषि र पशु सेवालाई कृषककाबीचमा सहज पहुँचको व्यवस्था गरेको मन्त्री साहले बताए । उनले कार्यालय स्थापना हुँदा केन्द्र सरकारको अधिकार प्रदेश सरकारमा आएको र प्रदेश सरकारले स्थानीयतहको कामलाईसमेत सहयोग पुर्याउने बताए ।

कृषि र पशुपालनलाई व्यावसायिक बनाउन विज्ञको सेवा दिने, आधुनिकीकरण र यान्त्रिकीकरणबारे तालीम दिने र सबै स्थानीय तहलाई संयोजन गर्न नयाँ कार्यालय स्थापना गरिएको कृषि ज्ञान केन्द्रका योजना अधिकृत किसुनदेव राउतले बताए ।

Ad
Ad

डबली मिडिया प्रा.लि.द्वारा सञ्चालित डिजिटल न्युज पोर्टल अनलाइन डबली डटकम निरन्तर चलिरहेको छ ।
हामीले खासगरी खोजमूलक समाचारलाई स्थान दिने गरेका छौं । सन्तुलित विचार हाम्रो अनलाइनको प्राथमिकता हो ।

डबली मिडिया प्रा.लि. द्वारा संचालित 

अनलाइन डबली डटकम को लागि

अध्यक्षः दिपेन्द्र रावल

सम्पादकः धनन्‍जय बुढा

दर्ता नं. १५४/०७३-७४

Dabali Media
Anamnagar Kathmandu
Phone
01-4771244
Email
[email protected]
[email protected]